SAY BALEY KON BASISTA

Ni: Devet M. Soriano

No narengel da la’y ngaran ya Basista,
Say nanunutan da, tatak ya orkestra,
Balet say tugtuwa, masulok ni’d satan
So amin ya mablin pakanugnunutan.

Lubir ya mabiskeg so anapa’y baley,
Aya met so salming ya pankakasakey
Katon no nanengneng ko la ra yan gawa,
Biskeg na pamilya’y ibabalikas da.

Ta no nanengneng mo ira’y kaabungan
Ya walay abaka tan pyet no maminsan
Tan sara’y tutuo ya mantutulungan,
“Aya so baley ko!”, atan so nibagam.

Melag no bilangen labat so barangay
Insan say luyag to kumparad kaabay
Balet no aliwan mata so gamiten,
Diman mo nasukat so pinablin sileng.

No ikumparak met ed arom ya baley
So kareenan ton labay kon idayew,
Anggapo siguro’y nayarin unsalat
Anggano mangiter ni’y balon sayaksak.

Agaylay liket ko no unsesempet ak
Tan nanenengneng ko’y alog ya mainat,
Amin ya probleman aakbibiten ko,
Pupunasa’y dagem dyad panaakar ko.

Kumon dyad nasabi ni ran henerasyon,
Ag kumon nabalang so simpit ya nayon
Tan say kareenan, lanang ya unsirom
Pyan sayan baley et lawas ya magnayon.

emanilapoetry - Exponent of today's Filipino poetry